9-may — Xotira va qadrlash kuni munosabati bilan Sariosiyo tumanida “Burch, jasorat, matonat” shiori ostida ma’naviy-tarbiyaviy tadbir tashkil etildi.
Tadbir doirasida Surxondaryo viloyati Mudofaa ishlari boshqarmasi hamda Sariosiyo tumanidagi 18-sonli umumiy o‘rta ta’lim maktabining “Vatan tayanchi” otryadi a’zolari “Yoqutli bog‘” mahallasida istiqomat qiluvchi, Ikkinchi jahon urushi yillarida front ortida mehnat qilgan 101 yoshli Yоrov O‘rinbaddal ota holidan xabar oldilar.
Samimiy uchrashuv davomida nuroniy ota urush yillaridagi og‘ir mehnat, xalqning sabr-matonati hamda tinch hayot uchun qilingan fidokorona xizmatlar haqida xotiralarini so‘zlab berdi. U yoshlarni tinchlikni asrash, Vatanga sadoqat va ajdodlar merosiga hurmat bilan qarashga chaqirdi.
Mazkur tashrif yosh avlodda Vatanga muhabbat, tarixga hurmat va nuroniylarga ehtirom tuyg‘ularini yanada mustahkamlashga xizmat qildi.
