Sport — yoshlarning irodasi, intizomi va vatanparvarlik ruhini shakllantiruvchi muhim omillardan biridir. Shu jihatdan Toshkent viloyatida o‘tkazilgan Karate-Do Shotokan Ryu Kasy Xa yo‘nalishi bo‘yicha Markaziy Osiyo chempionati nafaqat sport bellashuvi, balki yoshlar salohiyatini namoyon etuvchi muhim maydonga aylandi.
Nufuzli musobaqada Tojikiston, Qozog‘iston, Qirg‘iston, Turkmaniston va O‘zbekiston sportchilari ishtirok etdi. Musobaqa doirasida O‘zbekiston Respublikasi Mudofaa vazirligi boshchiligida alohida karate-do bellashuvlari ham tashkil etildi. Unda Sariosiyo tumanidagi “Kelajak” markazi jamoasi ham faol qatnashdi. Jamoa tarkibida direktor o‘rinbosari Sh. Begaliyev, to‘garak rahbarlari M. Nusratullayev, E. Narziyev, F. Mirzamurodov hamda 21 nafar yosh sportchi ishtirok etdi.
Yakuniy natijalarga ko‘ra, sariosiyolik karatechilar 10 ta oltin, 8 ta kumush va 5 ta bronza medalni qo‘lga kiritib, yuksak natijalarga erishdilar.
Mazkur muvaffaqiyat yoshlar o‘rtasida sportni rivojlantirish, ularning bo‘sh vaqtini mazmunli tashkil etish va xalqaro maydonda mamlakat nufuzini oshirishda muhim ahamiyat kasb etadi.
