Yoshlarning intellektual salohiyatini oshirish, ularni bilimga chanqoq va keng fikrlaydigan shaxs sifatida tarbiyalash bugungi ta’lim tizimining ustuvor yo‘nalishlaridan biridir. Shu maqsadda O‘zbekiston Respublikasi Prezidentining 2022-yil 20-yanvardagi “Zakovat” intellektual o‘yinini ommaviy-ma’rifiy harakatga aylantirishga qaratilgan qarori asosida Uzun tumanida muhim tadbir tashkil etildi.
Tuman Maktabgacha va maktab ta’limi bo‘limiga qarashli umumta’lim maktablari o‘quvchilari o‘rtasida “Zakovat” intellektual o‘yinining tuman bosqichi o‘tkazildi. Unda ishtirok etgan jamoalar o‘z bilimlarini, mantiqiy fikrlash qobiliyatini hamda hozirjavobliklarini sinovdan o‘tkazdilar. Savollar maktab dasturiga oid fanlar asosida tuzilib, o‘quvchilarning keng dunyoqarashi va tezkor tafakkuri alohida baholandi.
Yakuniy natijalarga ko‘ra, 1-o‘rinni 54-maktab jamoasi qo‘lga kiritdi va tuman bosqichining g‘olibi sifatida e’tirof etildi.
Mazkur intellektual o‘yinlar yoshlar o‘rtasida bilimga qiziqishni oshirish, sog‘lom raqobat muhitini shakllantirish va kelajakda yetuk, tafakkuri keng avlodni tarbiyalashda muhim ahamiyat kasb etadi.
