O‘zbekiston Respublikasi Prezidenti, Qurolli Kuchlar Oliy Bosh Qo‘mondoni Shavkat Mirziyoyevga harbiy xizmatchilarni ijtimoiy qo‘llab-quvvatlash, zaxira ofitserlar tayyorlash tizimini takomillashtirish hamda 9-may – Xotira va qadrlash kuniga tayyorgarlik yuzasidan axborot taqdim etildi.
Ma’lumotga ko‘ra, armiyada jangovar shaylikni oshirish, zamonaviy harbiy ta’lim va mashg‘ulotlarni takomillashtirish, shaxsiy tarkibning kasbiy va ruhiy tayyorgarligini mustahkamlash bo‘yicha tizimli ishlar olib borilmoqda. Yangi jangovar usullarni o‘zlashtirish va bo‘linmalar imkoniyatini oshirishga alohida e’tibor qaratilmoqda.
Shuningdek, 9-may – Xotira va qadrlash kuni munosabati bilan urush va mehnat faxriylarini qo‘llab-quvvatlash, ularga ehtirom ko‘rsatish, moddiy yordam berish hamda “Burch, jasorat, matonat!” shiori ostida keng ma’naviy-ma’rifiy tadbirlar tashkil etilishi rejalashtirilgan.
Bu tashabbuslar tinchlikni asrash, Vatan himoyachilarining jasoratini qadrlash va yosh avlodda vatanparvarlik ruhini mustahkamlashga xizmat qiladi.
