13–14-mart kunlari mamlakatimiz bo‘ylab o‘tkazilayotgan “Yurt obodligi, avvalo, mahalladan boshlanadi!” shiori ostidagi umumxalq xayriya hashari doirasida Sariosiyo tumanida ham keng ko‘lamli obodonlashtirish ishlari boshlandi.
Bugun erta tongda davlat va jamoat tashkilotlari, kommunal xizmatlar hamda keng jamoatchilik vakillari ishtirokida umumtuman hashariga tantanali start berildi. Tadbirda tuman hokimi Odiljon Yaqubov hashar xalqimizning hamjihatligi va mahalla birdamligini mustahkamlashda muhim ahamiyat kasb etishini ta’kidladi.
Hashar davomida mahallalar, ko‘p qavatli uylar atrofi, ko‘chalar, guzar va xiyobonlar, ziyoratgoh hamda qabristonlarda obodonlashtirish va ko‘kalamzorlashtirish ishlari olib borilmoqda. Shuningdek, ijtimoiy himoyaga muhtoj fuqarolarning uy-joy sharoitlarini yaxshilashga ko‘maklashish ham rejalashtirilgan.
Mazkur ezgu tashabbus hududlarni yanada obod qilish bilan birga, aholining hamjihatligi va o‘zaro mehr-oqibatini mustahkamlashga xizmat qilmoqda.
