Qumqo‘rg‘on tumanidagi “Navbahor” mahallasida aholi vakillari bir yoqadan bosh chiqarib, ezgu an’ana — hasharni uyushqoqlik va hamjihatlik ruhida o‘tkazmoqda.
Xususan, mahalladagi maktab va bog‘chani o‘zaro bog‘lovchi yo‘lda hashar tashkil etilib, fuqarolar tomonidan piyodalar uchun qulay va xavfsiz yo‘lakcha barpo etilmoqda. Hashar davomida yo‘l atroflari tozalanib, yer tekislash ishlari olib borilmoqda, yurish uchun xavfsiz sharoit yaratishga alohida e’tibor qaratilmoqda.
Mazkur tashabbus nafaqat bolajonlar va ota-onalar uchun qulay va xavfsiz harakatlanish muhitini yaratishga, balki hududni obodonlashtirish, mahalla ko‘rinishini yanada chiroyli va fayzli qilish, aholi o‘rtasida hamjihatlik va birdamlikni mustahkamlashga ham xizmat qiladi.
