Prezident Shavkat Mirziyoyev raisligida Surxondaryo viloyatini kompleks rivojlantirishga bag‘ishlangan yig‘ilish davom etmoqda.
Davlat rahbari o‘z nutqida Surxondaryoni Yangi O‘zbekistonning janubiy tayanch ustuni sifatida ta’riflab, hududni izchil rivojlantirish strategik ahamiyat kasb etishini ta’kidladi.
Qayd etilishicha, so‘nggi yillarda viloyatda 5 milliard dollarlik 8 mingdan ortiq loyiha ishga tushirilgan. Xitoy, AQSH, Rossiya, Hindiston, Avstriya va Vengriya bilan investitsiya hamda savdo yo‘nalishida yana 10 milliard dollarlik kelishuvlarga erishilgan.
Ijtimoiy sohada ham sezilarli o‘zgarishlar amalga oshirildi: maktabgacha ta’lim qamrovi 28 foizdan 68 foizga yetdi, 23 ta yangi maktab qurildi, 448 tasi ta’mirlandi va 102 ming qo‘shimcha o‘quvchi o‘rni yaratildi. 688 ta ko‘p qavatli uy barpo etilib, 32 ming oila yangi xonadonga ko‘chib o‘tdi. Angor, Boysun, Jarqo‘rg‘on, Sariosiyo va Termiz tumanlarida “Yangi O‘zbekiston” massivlari tashkil etildi.
Shuningdek, “To‘palang ombori suvidan foydalanish” loyihasi doirasida Termiz shahri hamda 10 ta tumandagi 563 ming aholining ichimlik suv ta’minoti yaxshilangani qayd etildi.
Yig‘ilishda hududni yanada rivojlantirishning ustuvor yo‘nalishlari muhokama qilinmoqda.
