Prezident yoshlar bilan uchrashuvda axborot xurujlari kuchayib borayotgan bugungi sharoitda yoshlar o‘rtasida kitobxonlikni ommalashtirish ustuvor vazifa ekanini ta’kidladi. Shu maqsadda “Kitobxonlik madaniyatini rivojlantirish” jamg‘armasi tashkil etilib, eng iste’dodli yozuvchilarga ijodiy buyurtma beriladi va ular bir yil davomida har oy 20 million so‘mdan rag‘batlantiriladi.
Shuningdek, eng sara xorijiy asarlarni o‘zbek tiliga, milliy adabiyotlarni esa xorijiy tillarga tarjima qilish va chop etish xarajatlarining yarmi qoplanadi. Yangi o‘quv yiliga qadar eng yaxshi 100 ta asardan iborat to‘plam tayyorlanib, barcha maktab va texnikumlarga yetkaziladi. Eng faol kitobxon o‘quvchilar 10 million so‘m mukofot bilan taqdirlanadi.
Bundan tashqari, kutubxona, “book cafe” va kitob do‘konlari ochib, oyiga 10 ming donadan ortiq savdoga erishgan tadbirkorlarga uch yil muddatga 1 milliard so‘mgacha 7 foizli ssuda ajratiladi. Mazkur chora-tadbirlar yoshlarning ma’naviy immunitetini mustahkamlash, tafakkur va dunyoqarashini kengaytirish hamda jamiyatda mutolaa madaniyatini yangi bosqichga olib chiqishga xizmat qiladi.
