Jamiyat taraqqiyotida ayollarning o‘rni beqiyos. Ilmli, ma’rifatli va tashabbuskor ayol nafaqat oila tayanchi, balki butun millat kelajagini bunyod etuvchi kuchdir. Ana shu g‘oya asosida Termiz shahridagi 2-sonli Bolalar musiqa va san’at maktabida “Ilmli ayol – millat bunyodkori” mavzusida davra suhbati tashkil etildi.
Tadbirda Xalq deputatlari Termiz shahar Kengashi raisi Dilbar Normurodova ishtirok etib, ayollarning ilm-fan, ta’lim va jamiyat hayotidagi faolligi haqida o‘z fikr-mulohazalarini bildirdi. Suhbat davomida xotin-qizlarning fidokorona mehnati, erishayotgan yutuqlari hamda yosh avlod tarbiyasidagi o‘rni alohida ta’kidlandi.
So‘zga chiqqanlar ilmli ayol – farzand tarbiyasida, oilada sog‘lom muhit yaratishda, jamiyatda esa ma’naviy yuksalishni ta’minlashda muhim omil ekanini qayd etdilar. Shuningdek, bugungi kunda xotin-qizlar uchun yaratilayotgan keng imkoniyatlar, ularning ta’lim olishi, kasb-hunar egallashi va o‘z salohiyatini ro‘yobga chiqarishi uchun mavjud sharoitlar haqida atroflicha so‘z yuritildi.
Davra suhbati ochiq muloqot va savol-javoblar ruhida o‘tib, ishtirokchilarda katta taassurot qoldirdi. Bunday ma’rifiy uchrashuvlar xotin-qizlarning ijtimoiy faolligini oshirish, ularni qo‘llab-quvvatlash va millat ravnaqiga munosib hissa qo‘shishiga turtki bo‘lib xizmat qiladi.
