Termiz tumani Ichki ishlar bo‘limi binosida Jinoyat ishlari bo‘yicha tuman sudi tomonidan sayyor sud majlisi o‘tkazildi. Sud raisi Sh. Hasanov raisligida nazorat ostida bo‘lgan, ozodlikni cheklash hamda axloq tuzatish ishlari jazosini o‘tayotgan 3 nafar shaxsning murojaati ko‘rib chiqildi.
Sud jarayonida ularning jazo o‘tash davridagi xulq-atvori, tuzalish yo‘liga o‘tgani, sodir etgan qilmishining oqibatlarini anglab yetgani hamda ijobiy tavsiflari atroflicha o‘rganildi. Qarorga ko‘ra, O‘zbekiston Respublikasi Jinoyat kodeksi 73-moddasi asosida 2 nafar ozodlikni cheklash jazosini, 1 nafar esa axloq tuzatish ishlari jazosini o‘tayotgan shaxs muddatidan oldin shartli ravishda ozod qilindi.
Mazkur sayyor sud majlisi jazoni ijro etishda insonparvarlik tamoyillarini ta’minlash, tuzalish yo‘liga o‘tgan shaxslarni jamiyatga qayta moslashtirish va ularning ijtimoiy hayotga integratsiyasini qo‘llab-quvvatlashda muhim ahamiyat kasb etadi.
