Termiz shahrida O‘zbekiston Respublikasi Bojxona organlari xodimlari kuni munosabati bilan tantanali tadbir bo‘lib o‘tdi. Bayram tadbirida Surxondaryo viloyati hokimi Ulug‘bek Qosimov ishtirok etib, bojxona tizimi xodimlarini kasb bayrami bilan samimiy tabrikladi.
Ta’kidlanganidek, Yangi O‘zbekistonda olib borilayotgan keng ko‘lamli islohotlar doirasida bojxona tizimining o‘rni tobora ortib bormoqda. Ayniqsa, bugungi global murakkab va tahlikali sharoitda davlat chegaralarining ishonchli muhofazasi, iqtisodiy xavfsizlikni ta’minlash, aholi salomatligi va jamiyat xavfsizligini himoya qilish bojxona xodimlaridan yuksak kasbiy mahorat, halollik va fidoyilikni talab etishi qayd etildi.
Tadbir davomida bojxona organlarida uzoq yillardan buyon halol va fidokorona xizmat qilib kelayotgan bir guruh xodimlar Surxondaryo viloyati hokimligining faxriy yorliqlari hamda esdalik sovg‘alari bilan taqdirlandi.
Shuningdek, san’atkorlar ishtirokidagi bayramona konsert dasturi tadbirga ko‘tarinki ruh bag‘ishlab, ishtirokchilarga bayramona kayfiyat ulashdi.
