Sariosiyo tumani hokimi Odiljon Yaqubov tumanidagi “Samo Mehr Ko‘chatchilik” fermer xo‘jaligi yer maydonida tashkil etilishi rejalashtirilgan “Ko‘chatchilik maktabi” loyihasi bilan tanishdi. Shu yerning o‘zida, xo‘jalik rahbarining ko‘chatchilikni rivojlantirish yo‘nalishida mavjud muammolari hamda yangi tashabbuslarini tingladi.
Tuman rahbari ushbu loyihani yanada takomillashtirish, sohani yanada rivojlantirish, shuningdek, tadbirkorga har tomonlama amaliy ko‘mak ko‘rsatish bo‘yicha mutasaddilarga tegishli topshiriqlar berdi.
Mazkur loyihani amalga oshirish orqali, ko‘chatchilikni yanada rivojlantirish va viloyatning barcha mahallalarida ko‘chatchilikni ommalashtirish ko‘zda tutilgan bo‘lib, bu aholi bandligini oshirish va daromad manbalarini kengaytirishda muhim ahamiyat kasb etadi.
Ma’lumot o‘rnida, hozirgi kunda xo‘jalikning 10 gektar maydonida, 40 turdan ziyod mevali va manzarali daraxt-buta ko‘chatlari yetishtirilmoqda.
