Surxondaryo viloyatida hududlarni yanada obodonlashtirish va sanitariya-tozalik ishlarini kuchaytirish maqsadida umumviloyat jamoatchilik hashari davom etmoqda. Ushbu xayrli tashabbus viloyat hokimi Ulug‘bek Qosimov tashabbusi bilan joriy yilning 15-yanvaridan 15-fevraliga qadar viloyatning barcha shahar va tumanlarida tashkil etilmoqda.
Hashar doirasida Termiz shahri hamda joylardagi mahallalar, ijtimoiy soha obyektlari, markaziy ko‘chalar va avtomobil yo‘llari bo‘ylarida keng ko‘lamli obodonlashtirish ishlari olib borilmoqda. Jumladan, atrof-muhitni tozalash, chiqindilarni yig‘ish va belgilangan hududlardan olib chiqish ishlari uyushqoqlik bilan amalga oshirilmoqda.
Mazkur umumxalq tashabbusi yurtimizda yanada ozoda, obod va fayzli muhit yaratishga xizmat qilmoqda. Shu munosabat bilan barcha yurtdoshlarimiz umumviloyat jamoatchilik hasharida faol ishtirok etib, Surxon vohasining yanada obod bo‘lishiga munosib hissa qo‘shishga chorlanadi.
