O‘zbekiston va Xitoy o‘rtasidagi strategik sheriklik doirasida savdo-iqtisodiy va investitsiyaviy hamkorlik izchil kengayib bormoqda. Ushbu hamkorlik doirasida Termiz shahrida Surxondaryo viloyati hokimi Ulug‘bek Qosimov Xitoy Xalqaro kommunikatsiya markazi raisi Long Yuysyan hamda “JDB Group Limited” kompaniyasi raisi Chen Xung To boshchiligidagi delegatsiyani qabul qildi.
Uchrashuvda Surxondaryo viloyatida istiqbolli loyihalarni amalga oshirish masalalari muhokama qilinib, avvalgi kelishuvlarga muvofiq oltinga boy hududlarni birgalikda o‘zlashtirish hamda qimmatbaho ma’danlarni qayta ishlash bo‘yicha qo‘shma loyihalarni yo‘lga qo‘yish yuzasidan kelishuvlar imzolandi. Ushbu kelishuvlar hudud iqtisodiyotini rivojlantirish va investitsiya salohiyatini oshirishga xizmat qilishi qayd etildi.
