Islom taraqqiyot banki mablag‘lari hisobidan Sherobod tumanidagi “Do‘stlik” mahalla fuqarolar yig‘ini hududida bir qator muhim infratuzilma loyihalari izchil amalga oshirilmoqda. Jumladan, mahalla hududida elektr ta’minotini yaxshilash maqsadida mavjud tarmoqlar rekonstruksiya qilinib, 4 dona transformator punkti o‘rnatilishi hamda 8 kilometr elektr tarmog‘i yangilanishi belgilangan. Shuningdek, mahallaning asosiy va ichki yo‘llarini mukammal ta’mirlash va asfaltlash ishlari olib borilmoqda. Ushbu yo‘l loyihalari transport qatnovini yengillashtirish, aholi uchun qulay va xavfsiz harakat muhitini yaratishga xizmat qiladi.
Bundan tashqari, mahalla hududida piyodalar yo‘lakchalarini qurish hamda energiya tejamkor tungi yoritish chiroqlari bilan jihozlash bo‘yicha yangi qurilish ishlari boshlangan. Ushbu loyiha aholi xavfsizligini ta’minlash, ayniqsa, kechki va tungi vaqtlarda harakatlanish qulayligini oshirishga qaratilgan.
Eng yirik loyihalardan biri sifatida toza ichimlik suvi ta’minotini yaxshilash ishlari ham amalga oshirilmoqda. Mazkur loyiha doirasida 30 kilometrga yaqin ichimlik suvi tarmoqlari barpo etilib, mahalla aholisi uzluksiz va sifatli ichimlik suvi bilan ta’minlanishi ko‘zda tutilgan.
