Surxondaryo transport va qurilish texnologiyalari texnikumi kutubxonasi zamonaviy va dolzarb maxsus fan adabiyotlari hamda o‘quv qo‘llanmalar bilan ta’minlandi. Xususan, kompyuter grafikasi va dizayni, elektromontajchi hamda qurilish ishlari ishchisi yo‘nalishlariga oid yangi darsliklar va qo‘llanmalar kutubxona fondidan o‘rin oldi.
Mazkur adabiyotlar ta’lim jarayonining sifatini oshirish, talabalarning nazariy va amaliy bilimlarini mustahkamlash, shuningdek, mustaqil ta’limni samarali tashkil etishda muhim manba bo‘lib xizmat qiladi.
Yangi kelgan kitoblarni targ‘ib etish maqsadida texnikum kutubxonachisi tomonidan o‘qituvchilar va ishlab chiqarish ta’limi ustalari ishtirokida kitobxonlik targ‘iboti tadbiri tashkil etildi. Tadbir davomida yangi darsliklarning mazmuni, amaliy ahamiyati va ta’lim jarayonidagi o‘rni haqida atroflicha ma’lumot berildi.
Ushbu tashabbus ta’lim sifatini yanada yuksaltirish, talabalarni zamonaviy bilim va ko‘nikmalar bilan qurollantirish yo‘lidagi muhim qadamlardan biri hisoblanadi.
