Yangi yil bayrami arafasida Surxondaryo viloyatida mehr-oqibat va saxovat timsoli bo‘lgan tadbirlar tashkil etildi. Viloyat hokimi Ulug‘bek Qosimov ko‘p tarmoqli bolalar tibbiyot markazi hamda viloyat onkologiya dispanserida davolanayotgan bolajonlar va bemorlar holidan xabar olib, ularga Yangi yil sovg‘alari hamda samimiy tilaklarini bildirdi.
Uchrashuv davomida viloyat rahbari bemorlarning tezroq sog‘ayib, o‘z oilalari bag‘riga qaytishi uchun davolanish jarayonini sifatli tashkil etish, zarur tibbiy xizmatlar va qulay shart-sharoitlarni yaratish muhimligini alohida ta’kidladi.
Shuningdek, Termiz shahrida “Yagona ijtimoiy reestr”ga kiritilgan ijtimoiy himoyaga muhtoj oilalar farzandlariga ham bayram sovg‘alari yetkazib berildi. Yangi yil arafasida amalga oshirilayotgan bunday ezgu tadbirlar bolajonlar qalbiga quvonch, ularning ota-onalariga esa ishonch va umid baxsh etib, jamiyatda mehr-oqibat muhitini yanada mustahkamlashga xizmat qilmoqda.
