Yangi yil bayrami munosabati bilan Surxondaryo viloyatining barcha hududlarida arzonlashtirilgan oziq-ovqat mahsulotlari yarmarkalari tashkil etildi. Ularda savdo jarayonlarining tartibli va xavfsiz olib borilishi, shuningdek, sifatli mahsulotlarning barqaror va maqbul narxlarda sotilishi ustidan doimiy nazorat o‘rnatilgan.
Viloyat hokimi Ulug‘bek Qosimov Termiz shahridagi “Yashil dunyo” markaziy dehqon bozorida tashkil etilgan bayram yarmarkasi faoliyati bilan tanishdi. Ma’sullar tomonidan belgilangan vazifalar ijrosi doirasida tartib-intizom va xavfsizlikni ta’minlash, sotuvchi hamda xaridorlar uchun qulay sharoitlar yaratish borasida axborot berildi.
Viloyat rahbari barcha hududlardagi bayram yarmarkalarida aholi ehtiyojidan kelib chiqqan holda mahsulotlarni yetarli miqdorda va arzon narxlarda sotilishini ta’minlash, asosiy e’tiborni esa bayram dasturxoni uchun zarur bo‘lgan barcha turdagi mahsulotlar bo‘lishiga qaratish bo‘yicha topshiriqlar berdi.
Shuningdek, mas’ul tuzilmalarga bozorlar, savdo markazlari va yarmarkalarda yong‘in hamda texnika xavfsizligini mukammal daraja ta’minlash, jamoat tartibini kuchaytirish bo‘yicha alohida vazifalar yuklandi.
