Termiz davlat universiteti jamoasidan yana bir quvonchli xabar. Toshkent viloyatidagi Olimpiya shaharchasida bo‘lib o‘tgan nufuzli “O‘zbekiston Judo Tour 2025” turnirida universitet talabasi Toshpo‘latov Nizomiddinxo‘ja yuksak mahorat va qat’iyat namoyon etib, musobaqa g‘olibiga aylandi.
73 kilogramm vazn toifasida bahs olib borgan sportchi barcha raqiblarini ishonchli tarzda mag‘lub etib, faxrli 1-o‘rinni qo‘lga kiritdi hamda oltin medal sohibiga aylandi.
Mazkur yutuq Termiz davlat universitetida sportni rivojlantirish, yoshlarning jismoniy tayyorgarligi va professional mahoratini oshirish borasida olib borilayotgan tizimli ishlarning samarasi bo‘lib, universitet jamoasi va talabalarimiz uchun katta faxr hisoblanadi.
