Surxondaryo viloyatida qish mavsumida yuzaga kelishi mumkin bo‘lgan yong‘inlar va is gazidan zaharlanish holatlarining oldini olish maqsadida keng ko‘lamli profilaktik ishlar amalga oshirilmoqda. Shu munosabat bilan viloyatda navbatdagi muhim yig‘in bo‘lib o‘tdi.
Tadbir Surxondaryo viloyati hokimi, fuqaro muhofazasi boshlig‘i Ulug‘bek Qosimov rahbarligida, davlat va jamoat tashkilotlari vakillari hamda videokonferensaloqa orqali shahar va tumanlar mas’ullari ishtirokida o‘tkazildi. Yig‘inda maxsus texnikalar namoyishi ham tashkil etildi.
Viloyat rahbari hududlar va tarmoqlar kesimida qish mavsumini xavfsiz va barqaror o‘tkazish, energiya resurslarini uzluksiz yetkazib berish hamda uzilishlarning oldini olish bo‘yicha aniq vazifalarni belgilab berdi. Shuningdek, mazkur yo‘nalishdagi ishlarni tizimli tashkil etish maqsadida “Dolzarb 70 kunlik” profilaktik chora-tadbirlariga rasman start berildi.
Yig‘in yakunida “Yong‘in xavfsizligi oyligi” doirasida ko‘p qavatli uylar, ijtimoiy soha obyektlari va boshqa inshootlarni yong‘in hamda is gazi xavfidan himoya qilish, xatlovdan o‘tkazish va aniqlangan kamchiliklarni bartaraf etish yuzasidan mas’ullarga aniq ko‘rsatma va tavsiyalar berildi.
