Jarqo‘rg‘on tumanida qariyb bir asrlik tarixga ega, ko‘p yillardan buyon aholining haqli e’tirozlariga sabab bo‘lib kelgan Zang kanali ustidagi eski ko‘prik buzilib, uning o‘rnida zamonaviy, mustahkam va keng yangi ko‘prik qurilishi boshlandi. Aholi kundalik qatnovda keng foydalanadigan ushbu ko‘prikning yaroqsiz holga kelgani oxirgi yillarda xavfsizlik nuqtai nazaridan jiddiy muammolar tug‘dirayotgandi.
Mutasaddi tashkilotlar tomonidan loyihalash ishlari yakunlanib, qurilish jarayoni jadallashtirilgan tartibda olib borilmoqda. Eng e’tiborli jihati — yangi ko‘prik joriy yilning 31-dekabriga qadar foydalanishga topshirilishi rejalashtirilgan.
Yangi ko‘prik loyihasida mustahkam temir-beton konstruksiya, kengaytirilgan yo‘l qoplamasi, ikkala tomonda piyodalar yo‘laklari va zamonaviy yoritish tizimi kabi qulayliklar aks etgan. Inshootning barpo etilishi Jarqo‘rg‘on tumanida transport harakatini yengillashtirib, “Dam” mahallasi va yaqin hududlar aholisi uchun muhim qulaylik yaratishi kutilmoqda.
