Sariosiyo tumanida Respublika Ma’naviyat va ma’rifat markazining viloyat bo‘limi tashabbusi bilan “To‘ymisan, to‘y bo‘ldi!” shiori ostida namunali ixcham to‘y tashkil etildi. Tadbir Dilfuza Islomova xonadoni bilan kelishilgan holda, ortiqcha dabdaba va isrofgarchiliksiz, tejamkorlik tamoyillari asosida o‘tkazildi.
Kuyov va kelin an’anaviy tarzda qimmatga tushadigan bir qator marosimlardan — fotiha, idish qaytarish, to‘qqiz toboq, kuyov va kelin chaqiriq, kuyov jo‘ralarni kutib olish kabi udumlardan voz kechishdi. Natijada butun to‘y jarayoniga atigi 25 million so‘m sarflandi.
Eng quvonarlisi, tejalgan mablag‘ hisobiga yoshlar ikki xonali uy xarid qilishga muvaffaq bo‘lishdi. Ushbu tajriba hududda ixcham va maqsadga muvofiq to‘ylarni targ‘ib etish bo‘yicha muhim namunaga aylandi.
