Surxon vohasida mehnatkashlar fidokorona mehnatini e’zozlash, ularning huquq va manfaatlarini himoya qilish yo‘lida faoliyat yuritayotgan kasaba uyushmalari harakatining 120 yilligi keng nishonlandi.
Termiz shahrida bo‘lib o‘tgan tantanali bayram tadbirida Surxondaryo viloyati hokimi Ulug‘bek Qosimov, O‘zbekiston tadbirkorlik, biznes va xizmat ko‘rsatish sohalari xodimlari kasaba uyushmasi Respublika kengashi raisi Ulug‘bek Muxamedov, nuroniylar, deputatlar hamda viloyat tashkilotlari vakillari ishtirok etishdi.
Viloyat rahbari o‘z tabrigida kasaba uyushmalarining jamiyatdagi o‘rni va mehnatkashlar manfaati yo‘lidagi xizmatlarini alohida ta’kidlab, barcha ishtirokchilarni Kasaba uyushmalari kuni hamda milliy kasaba uyushmalari harakatining 120 yillik yubileyi bilan samimiy tabrikladi.
Tadbir davomida fidokor faollar, nuroniylar hamda uyushma tizimidagi ilg‘or a’zolarga “O‘zbekiston kasaba uyushmalari harakatining 120 yilligi” esdalik nishonlari, faxriy yorliqlar va sovg‘alar topshirildi.
Bayramona ruhdagi dasturda Surxon vohasining taniqli san’atkorlari tomonidan ijro etilgan kuy-qo‘shiqlar yig‘ilganlarga quvonch, faxr va ilhom bag‘ishlab, tadbirni yanada fayzli va esda qolarli bayramga aylantirdi.
