Yangi xususiy maktab xizmatga shay

Denov tumanida ta’lim tizimini rivojlantirish yo‘lida navbatdagi muhim qadam tashlandi — tumandagi 76-maktabning bo‘sh turgan binosida 310 o‘rinli zamonaviy xususiy maktab foydalanishga topshirildi.
Yangi ta’lim maskani o‘quvchilar uchun qulay, xavfsiz va innovatsion muhit yaratish maqsadida zamonaviy sinf xonalari, kompyuter laboratoriyalari, fan kabinetlari, kutubxona va sport zallari bilan jihozlangan. O‘quv jarayonida ilg‘or pedagogik texnologiyalar, interaktiv o‘qitish usullari va raqamli ta’lim platformalaridan keng foydalanish rejalashtirilgan.
Tadbir davomida maktabda yaratilgan sharoitlar, o‘quvchilarga yaratilayotgan imkoniyatlar va o‘qituvchilarning faoliyati bilan tanishildi. Mutasaddilar ta’lim sifati, o‘quv dasturlari va boshqaruv tizimini xalqaro standartlarga yaqinlashtirish, o‘quvchilarning iqtidorini rivojlantirishga yo‘naltirilgan dasturlarni joriy etish muhimligini ta’kidladilar.
Mazkur xususiy maktabning ishga tushirilishi Denov tumanidagi ta’lim infratuzilmasini kengaytirish, yoshlar uchun qo‘shimcha o‘quv imkoniyatlari yaratish va sifatli ta’lim tizimini rivojlantirishga xizmat qiladi.