Oliy Majlis Qonunchilik palatasida 2025-yil 6-oktyabr kuni bo‘lib o‘tgan Ekologik partiya fraksiyasi yig‘ilishida “O‘zbekiston Respublikasining ayrim qonun hujjatlariga o‘zgartirishlar va qo‘shimcha kiritish to‘g‘risida”gi qonun loyihasi birinchi o‘qishda ko‘rib chiqildi.
Qonun loyihasining maqsadi — hukumat a’zolari va mahalliy rahbarlarning korrupsiyaga qarshi kurashdagi mas’uliyati va hisobdorligini oshirish, bu yo‘nalishdagi ishlarni tizimli va samarali tashkil etishdir.
Hujjatga ko‘ra:
Hokim lavozimiga nomzodlar endilikda xalq deputatlari kengashida nomzodi ko‘rib chiqilayotganda, hududni ijtimoiy-iqtisodiy rivojlantirish dasturi bilan bir qatorda korrupsiyaning oldini olish bo‘yicha aniq harakatlar rejasini ham taqdim etadi.
Vazirlar Mahkamasi a’zoligiga nomzodlar esa Qonunchilik palatasida nomzodi tasdiqlanayotganda tizimda korrupsiyani bartaraf etish bo‘yicha chora-tadbirlar dasturini taqdim etishlari shart bo‘ladi.
Fraksiya a’zolari fikricha, ushbu tartib rahbarlik lavozimlariga tavsiya etilayotgan shaxslarning ochiqlik, javobgarlik va halollik tamoyillariga sodiqligini ta’minlashda muhim qadam bo‘ladi.
Yig‘ilish yakunida qonun loyihasi qo‘llab-quvvatlandi va tegishli qaror qabul qilindi.
