Ikki karra bayram

1-oktyabr – “O‘qituvchi va murabbiylar kuni” vohamizda ustozlarga bo‘lgan ehtirom va hurmatning ramzi sifatida keng nishonlandi. Aynan shu kunda ko‘plab maktabgacha ta’lim tashkilotlari, maktab va o‘quv maskanlari, sport maydonlarining foydalanishga topshirilgani yoshlar hamda ustozlar uchun munosib tuhfa bo‘ldi desak, mubolag‘a bo‘lmaydi.
Termiz davlat pedagogika institutida esa bu yilgi ustozlar kuni yanada ko‘tarinki ruhda o‘tdi. Institut hayotida muhim voqea – barcha qulayliklarga ega bo‘lgan yangi talabalar turar joyining tantanali ochilish marosimi bo‘lib o‘tdi. Bu esa institut jamoasi uchun ikki karra bayram bo‘ldi.
Tantanali tadbirda institut professor-o‘qituvchilari, talaba-yoshlari, keng jamoatchilik vakillari bilan bir qatorda, Turkiyaning Bursa shahridagi O‘zbekiston faxriy elchisi, tadbirkor va investor Ali Baklan ham ishtirok etdi.
So‘zga chiqqan mutasaddilar yig‘ilganlarni bayram bilan tabriklab, yoshlar uchun yaratilayotgan sharoitlarning ulkan ahamiyatini ta’kidladilar. Davlat-xususiy sherikchilik asosida qurilgan 5 qavatli, 400 o‘rinli yotoqxona zamonaviy talablarga to‘liq javob beradi. Binoda yotoq xonalari, o‘quv xonalari, kutubxona, sport va madaniy hordiq uchun mo‘ljallangan maskanlar barpo etilgan. Eng asosiysi, bu turar joy talabalar uchun nafaqat qulay yashash, balki samarali ta’lim olish, bo‘sh vaqtini mazmunli o‘tkazish va ijodiy izlanishlar olib borish imkonini ham yaratadi.
Darhaqiqat, yangi turar joy nafaqat shinam xonalar majmuasi, balki yoshlarning ma’naviy va intellektual kamolot sari intilishlariga xizmat qiluvchi maskan bo‘lib xizmat qiladi. Institut hayotidagi bu yangilik talabalar qalbida yanada g‘urur va mas’uliyat tuyg‘ularini kuchaytirishi shubhasiz.