Xabaringiz bor, joriy o‘quv yilidan boshlab xorijiy filologiya fakulteti tarkibida “Filologiya va tillarni o‘qitish: yapon tili” yo‘nalishi faoliyatini boshladi. Ushbu yo‘nalishda ta’lim olayotgan talabalarimiz ulkan maqsadlar sari dadil qadam tashlamoqda.
Talaba-yoshlarga nafaqat til o‘rgatish, balki Sharq madaniyatining nozik jilolarini anglatish, qadimiy va zamonaviylik uyg‘unligida malakali kadrlar tayyorlash asosiy maqsad qilib olingan.
Ana shu maqsad va muddaoga yoʼnaltirilgan tashabbuslar koʼzga tashlanmoqda. Talabalar o‘zbek milliy adras va atlasining betakror ranglarini yaponlarning milliy kimonosi bilan uyg‘unlashtirib, yangi timsol yaratdilar va shu liboslarda dars mashg‘ulotlariga ishtirok etishmoqda. Bu tashabbus o‘zbek va yapon xalqlarining do‘stligi, madaniy aloqalari va o‘zaro hurmatining ramzi bo‘lib gavdalanmoqda.
