Maktabgacha va maktab ta’limi vazirligi tashabbusi bilan o‘quvchi yoshlar va aholi o‘rtasida kitobxonlikni keng targ‘ib qilish, faol kitobxonlarni aniqlash hamda ularni rag‘batlantirish maqsadida Surxondaryo viloyatida “Kitobxonlik festivali” tashkil etildi. Termiz shahridagi San’at saroyida boshlangan festivalda mehmonlar turli kitobxonlik ko‘rgazmalari va iqtidorli yoshlarning chiqishlari bilan tanishishdi.
Tadbirda Surxondaryo viloyati hokimining o‘rinbosari Zulxumor Xidirova hamda viloyat Maktabgacha va maktab ta’limi boshqarmasi boshlig‘i Xusniddin Mamadiyevlar so‘zga chiqib, yurtimizda kitobxonlikni keng targ‘ib etish maqsadida amalga oshirilayotgan islohotlarni e’tirof etishdi. Viloyat bolalar kutubxonasining eski binosi ta’mirlanib, zamonaviy ko‘rinishga keltirilgani ham kitobxonlikka qaratilgan ulkan e’tiborning yorqin namunasi ekanligi ta’kidlandi.
Festival doirasida kitobxonlik ko‘rik-tanlovlarining g‘oliblari taqdirlandi. Shundan so‘ng, yangragan kuy-qo‘shiqlar barchaga bayramona kayfiyat bag‘ishladi. Tadbir soʻngida festival estafetasi Qashqadaryo viloyatiga topshirildi.
