Haydovchilik guvohnomasini yo‘qotganlar endilikda Yo‘l harakati xavfsizligi xizmatiga borib ovora bo‘lishmaydi. Endi bu jarayonni my.gov.uz portali orqali onlayn amalga oshirish mumkin.
Foydalanuvchi “Haydovchilik guvohnomasini rasmiylashtirish” xizmatidagi “Yo‘qolgan haydovchilik guvohnomasini tiklash” bo‘limi orqali ariza topshiradi.
Xizmat narxi — 370 ming 800 so‘m (0,9 BHM). Agar guvohnomani pochta orqali olish istagi bo‘lsa, qo‘shimcha 25 ming so‘m to‘lanadi.
Yangilangan guvohnoma 1 ish kunida tayyorlanadi. Pochta orqali buyurtma qilingan taqdirda esa 3 ish kunida yetkaziladi.
Ma’lumotlar tizimda tasdiqlanmagan, shaxs haydovchilik huquqidan mahrum etilgan yoki Ma’muriy javobgarlik kodeksining 131- va 136-moddalari bo‘yicha ish qo‘zg‘atilgan hollarda ariza rad etiladi.
