Muzrabot tumanining “A.Qodiriy” hududida joylashgan “Qodiriy Darband Agro” fermer xo‘jaligi dala maydonida 2026-yil hosili uchun to‘qsonbosti ekinlarni ekish va ulardan yuqori hosil olish masalalariga bag‘ishlangan o‘quv-amaliy seminar tashkil etildi. Seminarda tuman qishloq xo‘jaligi bo‘limi, fermerlar kengashi mutaxassislari, fermer xo‘jaliklari rahbarlari va dehqonlar ishtirok etib, to‘qsonbosti ekinlarni ekish, parvarish qilish va hosildorlikni oshirish borasidagi tajribalar bilan o‘rtoqlashdilar.
Tadbir davomida yerga ishlov berishning samarali usullari, sifatli urug‘ tanlash, suv va o‘g‘itlardan oqilona foydalanish, zararkunandalarga qarshi kurashishning ilmiy asoslangan choralariga alohida e’tibor qaratildi. Mutaxassislarning ta’kidlashicha, bunday seminarlar fermer va dehqonlarning bilim va ko‘nikmalarini boyitish, hosildorlikni barqaror oshirish va qishloq xo‘jaligi mahsulotlari yetishtirishda yuqori natijaga erishishda muhim o‘rin tutadi.
