O‘zbekistonda surunkali alkogolizmga qarshi farmakologik vosita davlat ro‘yxatidan o‘tkazilib, huquqiy muhofazaga olindi.
Alkogolizm insonda spirtli ichimliklarga patologik ishtiyoq, ruhiy va jismoniy qaramlik bilan kechadigan kasallik hisoblanadi. Yangi vosita aynan shu muammoni bartaraf etish maqsadida yaratilgan.
Ixtiro tibbiyotning bir nechta yo‘nalishlarida, jumladan, farmakologiya va narkologiya sohasida qo‘llanishi mumkin. Asosiy vazifasi alkogolizmning I va II bosqichida samarali davo berish hamda uning qayta takrorlanishini oldini olishdir.
Mutaxassislar fikricha, bunday patentning olinishi ilmiy ishlanmalar mualliflarini huquqiy jihatdan to‘liq himoya qiladi. Bu esa ularning rivojlanishi uchun zarur shart-sharoit yaratib, noqonuniy foydalanishdan muhofaza qiladi. Shu bilan birga, ixtiro egasi undan iqtisodiy manfaat ko‘rish imkoniga ega bo‘ladi.
Adliya vazirligi aholini yangi ixtirolarini rasmiylashtirishga chaqirar ekan, arizalarni im.adliya.uz portali orqali onlayn tarzda topshirish mumkinligini eslatdi.
