Qishloq xo‘jaligini rivojlantirish va suvdan oqilona foydalanish bugungi kunning eng muhim masalalaridan biri hisoblanadi. Prezidentimiz tomonidan belgilab berilgan vazifalar ijrosini ta’minlash maqsadida Sariosiyo tumani hokimi Abduqodir Donayev, viloyat hokimining o‘rinbosari Ilhom Saparov hamda mas’ullar tumanning Dashnobod hududida joylashgan “Jar osti-1” kanalida olib borilayotgan tozalash va beton qoplama ishlari jarayonini o‘rgandi.
Ko‘rik davomida ishlarni sifatli bajarish, betonlash jarayonini belgilangan muddatlarda yakunlash va sug‘orish tarmoqlarini mavsumga tayyor holga keltirish bo‘yicha mas’ullarga tegishli topshiriq va tavsiyalar berildi.
Ma’lumot o‘rnida, 2025–2026-yillarda tuman Suv yetkazib berish davlat muassasasi tomonidan 30 kilometr uzunlikdagi ichki sug‘orish tarmoqlarini betonlashtirish rejalashtirilgan. Hozirga qadar 1,05 kilometr ichki sug‘orish tarmoqlariga beton qoplamalar yotqizildi.
Natijada samarasiz isrof bo‘layotgan suv kamayib, 530 gektar yer maydonida suv ta’minoti yaxshilanadi. Bu esa ekin yerlari hosildorligini oshirish, aholining tomorqa maydonlarini sug‘orish imkoniyatlarini kengaytirish hamda klaster va fermer xo‘jaliklarining daromadlarini ko‘paytirishga xizmat qiladi.
