Surxondaryo viloyat bolalar kutubxonasida “Kitobxonlik festivali” doirasida o‘tkaziladigan “Eng faol maktab kutubxonachisi” ko‘rik tanlovining viloyat bosqichi bo‘lib o‘tdi. Tanlov 3 shart asosida o‘tkazildi.
Ishtirokchilar Yangi O‘zbekistonda mening kutubxonam — “Buguni va istiqboli” loyihasining taqdimotini qilishgan bo‘lsa, sohaga oid savol-javoblarda bilimlari sinovdan o‘tdi. Shuningdek, ishtirokchilar mustaqil ravishda sohaga oid jarayonlarni amalga oshirdilar. Har bir shart qiziqarli va ishtirokchilarning bilim va salohiyatlarini, iqtidorlarini yuzaga chiqarishga xizmat qildi.
Yakuniy natijalarga ko‘ra Termiz tumanidagi 16-umumiy o‘rta ta’lim maktabi kutubxonachisi Nigora Primqulova 1-o‘ringa munosib ko‘rildi.
