Bugungi kunda ajralishlarning ortib borishi nafaqat oilalarning, balki butun jamiyatning barqarorligiga salbiy ta’sir ko‘rsatmoqda. Shu bois, oilaviy totuvlikni mustahkamlash, kelin-kuyov va qaynona-qaynota o‘rtasida mehr-oqibat hamda o‘zaro hurmatni kuchaytirish jamiyat taraqqiyoti uchun dolzarb masalalardan biridir.
Termiz shahri “Yoshlar markazi”da aynan shu mavzuga bag‘ishlab “Qaynonam – mening onam”, “Kelinim – mening bolam” nomli muhim tadbir o‘tkazildi. Unda viloyat hokimining o‘rinbosari Z. Xidirova, “Nuroniy” jamg‘armasi Respublika boshqarmasi boshlig‘i M. Umarov, viloyat bo‘limi raisi O. Soatov, shahar bo‘limi raisi T. Berdiyev, shuningdek, nuroniylar, “Buvijonlar maktabi” a’zolari, hoji otalar va onajonlar, mahallalardagi xotin-qizlar faollari ishtirok etishdi.
Yig‘ilishda ajralishlarning oldini olish yo‘llari, oilalarda sabr-toqat, o‘zaro hurmat va mehr-muruvvatni ustuvor qilish zarurligi keng muhokama qilindi. Ishtirokchilar o‘z hayotiy tajribalaridan kelib chiqib, oilaviy muammolarning yechimlari, yoshlarni sog‘lom turmush tarziga yo‘naltirish hamda milliy qadriyatlarni asrab-avaylash borasida takliflar bildirdilar. Bunday tadbirlar orqali jamiyatda oilaning ahamiyati yana bir bor ta’kidlanmoqda. Zero, mustahkam oila – sog‘lom tarbiya, sog‘lom tarbiya esa barqaror jamiyat kafolatidir.
