“Surxon” davlat qo‘riqxonasining “Sholqon” boʻlimida koʻplab noyob turlarni uchratish mumkin. U yerdagi fotoqopqonda jonivorlarning koʻrinish berishi kishi eʼtiborini tortmay qolmaydi. Bu safar boʻri tasvirga tushirilgan. Bo‘ri — itsimonlar oilasining yirik vakili bo‘lib, tashqi ko‘rinishidan katta itga o‘xshaydi. Tanasi baquvvat, ko‘kragi keng, oyoqlari uzun, boshi keng peshonali va ko‘zlari keng joylashgan bo‘ladi. Bo‘rining panjasi itnikiga qaraganda cho‘zilgan, ikki barmog‘i oldinga qaragan. Yag‘rin balandligi 60–85 santimetr, tanasining uzunligi 100–160 santimetr, dumining uzunligi 35–50 santimetr, og‘irligi esa 30–50 kilogramgacha yetadi.
Katta erkaklari urg‘ochilariga nisbatan o‘rtacha 20 foizga yirikroq bo‘ladi.
Ma’lumot uchun: bo‘rilar ob-havo sharoitlarini aniq seza oladi va 9 kilometr masofadagi tovush signallarini ham eshita oladi. Ularning hid bilish qobiliyati juda kuchli — 200 milliondan ortiq hidni ajratib olishga qodir. Yana bir qiziqarli jihati shundaki, bo‘rilar suvda juda erkin harakatlana oladi va bir suzishda 13 kilometr masofagacha suzib o‘ta oladi.
Jahongir Hadiyatullayev,
“Sholqon” boʻlimi boʻlim boshligʻi
