Yangi 2025–2026-o‘quv yiliga tayyorgarlik ishlari Termiz shahridagi barcha maktablarda muvaffaqiyatli yakunlandi. Ta’lim muassasalari zamonaviy jihozlar bilan ta’minlanib, qulay va shinam sinfxonalar oʻquvchilarni bagʻriga olishga tayyor.
Maktablarning tashqi va ichki ko‘rinishida zamonaviylik, obodonlik hamda qulaylik mujassam bo‘lib, o‘quvchilarning bilim olishiga barcha sharoitlar yaratildi. Ta’lim muhitida vatanparvarlik, milliy qadriyatlarga sadoqat va ma’naviy barkamollik ruhini aks ettirishga alohida e’tibor qaratildi.
Yurtboshimiz tashabbusi bilan har yili an’anaviy tarzda beriladigan barcha 1-sinf o‘quvchilar uchun “Prezident sovg‘alari” ham yetib keldi. Bu sovg‘alar kichik yurtdoshlarimizni yangi bosqichdagi bilim olishi yo‘lida rag‘bat va quvonchga to‘ldiradi.
Minglab o‘quvchilar yangi o‘quv yilini katta ishonch, orzu-intilish va quvonch bilan qarshi olishmoqda.
