Sariosiyo tumani markazida “Yangisaroy” savdo majmuasi bunyod etildi. Mamlakatimiz mustaqilligining 34 yilligi arafasida foydalanishga topshirilgan mazkur majmua Sariosiyo tumaniga oʻzgacha koʻrk bagʻishladi.
Ochilishi munosabati bilan tashkil etilgan tadbirda mazkur majmuada mehmonxona, umumiy ovqatlanish nuqtasi va savdo markazi aholiga qulay va maqbul xizmatlarini yoʻlga qoʻyishi, qolaversa, hududning tadbirkorlik salohiyatini yuksaltirishda muhim ahamiyatga ega ekani taʼkidlandi.
Ishtirokchilar majmuada yaratilgan shart-sharoit va qulayliklar, xizmatlar, mahsulotlar turlari, narxi va sifati bilan yaqindan tanishdi.
Saxovatpesha tadbirkor Nasiba Oripova “Yangisaroy” majmuasining ochilish munosabati bilan yigirma nafar bolajonlarning sunnat to‘yini ham o‘tkazib berdi. Tadbirda to‘y bolalarning ota-onalari, qarindosh-urug‘lari, mahalla faollari, mehnat faxriylari va keng jamoatchilik vakillari ishtirok etdi.
To‘y bolalarga sarpolar kiydirilib, maktab kiyimlari va boshqa esdalik sovg‘alari topshirildi. San’atkorlarning kuy-qo‘shiqlari tadbirga o‘zgacha fayz, bolajonlar va ularning yaqinlariga bir olam zavq bag‘ishladi.
