Avtobus kutishga koʻp vaqt ketadi. Bu vaqtimizni behuda sarflash bilan birga, asabbuzarlikka ham sabab boʻladi. Balki yoʻnalishli avtobuslar yetishmas. Ana shunday muammolarga yechim topish maqsadida Surxondaryo viloyat Transport boshqarmasi delegatsiyasi Xitoy Xalq Respublikasiga amaliy tashrif buyurdi.
Tashrif davomida delegatsiya a’zolari “Weichai Power” zavodida avtobuslar uchun ishlab chiqarilayotgan zamonaviy dvigatellar, ularning quvvati va ishonchliligi bilan tanishdi. Shuningdek, “ZHONGTONG BUS” kompaniyasida avtobuslarni ishlab chiqarish jarayonlari o‘rganildi.
Uchrashuvlar natijasida Surxondaryo viloyati uchun qo‘shimcha 65 ta avtobus yetkazib berish, ularni “Brutto” shartnomasi asosida muntazam qatnovlarga chiqarish bo‘yicha kelishuvga erishildi.Ayni paytda Termiz shahri uchun mo‘ljallangan 35 ta avtobusning birinchi partiyasi sinov va tayyorgarlik bosqichida bo‘lib, yaqin kunlarda yurtimizga yetkazib kelinadi.
Yangi avtobuslar aholiga xavfsiz, qulay va sifatli xizmat ko‘rsatish, shuningdek, Termiz shahar transport tizimini yanada rivojlantirishga xizmat qiladi.
