Paxta yigʻim-terimiga ham oz qoldi. Dalalarda esa qizgʻin tayyorgarlik ishlari boshlab yuborilgan. Paxta qabul maskanlari ham mavsumga shay.
Viloyat hokimi Ulug‘bek Qosimov Termiz tumanidagi paxta qabul qilish maskanida Xitoydan olib kelingan zamonaviy FM WORLD 4MZ-4 rusumli paxta terish mashinalari bilan tanishdi. Shuningdek, klaster va fermer xo‘jaliklari bilan mavsumiy vazifalar ijrosi muhokama qilindi. Tuman rahbariyati va mas’ullar tomonidan amalga oshirilayotgan ishlar va mavjud muammolar yuzasidan axborot berildi.
Viloyat rahbari paxta terish mashinalaridan samarali foydalanish, terim oldi agrotexnik tadbirlarni sifatli bajarish zarurligini ta’kidladi. Shu bilan birga, “Nurmuhammad Maftuna” fermer xo‘jaligida hosildorlik va tayyorgarlik ishlari joyiga chiqib o‘rganildi.
Tashrif davomida hokim Angor tumanidagi “Navshahar” kanali rekonstruksiyasi jarayonlari bilan tanishdi. Ishlarni jadallashtirish va loyihani belgilangan muddatda yakunlash bo‘yicha topshiriqlar berildi.
