Boysun tumani so‘ngi yillarda nafaqat turizm bo‘yicha, balki barcha jabhada rivojlanish, o‘zgarish va yangilanish bosqichida. Tumanda ulkan bunyodkorlik ishlari amalga oshirilib, hudud katta qurilish maydoniga aylangan. Viloyat hokimi Ulug‘bek Qosimov qurilish sohasida belgilangan vazifalar ijrosi bilan tanishish maqsadida Boysun tumanida bo‘ldi.
Tashrif doirasida “Temir darvoza” mahallasida 330 o‘rinli yangi maktab binosi hamda 12×24 o‘lchamdagi sport zali qurilishi, shuningdek, Darband-Machay qishlog‘ida Termiz davlat universitetiga qarashli “Darband” o‘quv-amaliyot direksiyasi loyihasi ko‘zdan kechirildi. Bundan tashqari, “Darband–Denov” yo‘nalishi bo‘yicha 4R105 “Darband–Boysun–Elbayon” avtomobil yo‘lining 5-70 km qismini rekonstruksiya qilish ishlari o‘rganildi.
Yo‘l harakati xavfsizligi va avtomobil yo‘llari boshqarmalari tomonidan yo‘llarni rekonstruksiya qilish, xavfsizlikni ta’minlash hamda yo‘lovchilar uchun qulay sharoitlar yaratishga qaratilgan loyihalar taqdimoti o‘tkazildi. Shu bilan birga, piyodalarning xavfsiz harakatlanishi uchun zarur infratuzilmani yaratish bo‘yicha aniq vazifalar belgilab berildi.
Yakunda tuman hokimligida qurilish sohasidagi vazifalar va amalga oshirilayotgan dasturlar ijrosi muhokama qilindi. Mutasaddilarning hisobotlari tinglanib, har bir loyihani sifatli va belgilangan muddatda amalga oshirish yuzasidan topshiriqlar berildi.
