Boysun tumanidagi “Kengdala” o‘rmon xo‘jaligi bo‘limiga qarashli archazorlarga tutash hududda quruq o‘tlar yonishni boshlagan. Kelib tushgan xabar bo‘yicha viloyat Favqulodda vaziyatlar boshqarmasi yong‘in-qutqaruv ekipajlari voqea joyiga yetib borgan.
Ma’lum bo‘lishicha, yong‘inni bartaraf etishga viloyat FVBdan 85 nafar shaxsiy tarkib, 4 ta texnika, o‘rmon xo‘jaligi bo‘limidan 40 nafar xodim, 4 ta texnika, IIBdan 6 nafar xodim, Mudofaa vazirligidan 20 nafar harbiy xizmatchi va bitta harbiy vertolyoti, mahalliy aholidan 40 nafar ko‘ngilli jalb etildi.
Shuningdek, sodir bo‘lgan yong‘inni bartaraf etish jarayonida yong‘in o‘chog‘ini monitoring qilish uchun chegara qo‘shinlarining uchuvchisiz uchish vositalari – dronlardan unumli foydalanilgan. Ertasi kuni tongda yong‘in o‘chirilgan.
