Surxondaryo viloyatida irrigatsiya tarmoqlarini modernizatsiya qilish tadbirlari doirasida 5 ta kanalda rekonstruksiya ishlari amalga oshirilmoqda. Viloyat hokimi Angor tumaniga tashrifida irrigatsiya sohasi mutasaddilari bilan uchrashuvda mazkur kanallarda olib borilayotgan ishlar holatini muhokama qildi. Mas’ullar Bandixon tumanidagi “Sherobod” mashina magistral va “Do‘stlik”, Muzrabot tumanidagi “R-1-V”, Sherobod tumanidagi “O‘ng tarmoq”, Angor tumanidagi “Novshahar” kanallarini inshootlari bilan birga rekonstruksiya qilish (betonlashtirish) ishlari ijrosi yuzasidan axborot berdi.
Mas’ullarga ishlarni sifatli va muddatida amalga oshirish, yangi tarmoq qurish va aholi hamda qishloq xo‘jaligi maydonlarini barqaror oqova suvlari bilan ta’minlash vazifalari belgilab berildi. Shundan so‘ng, viloyat rahbari Muzrabot tumanida g‘alla o‘rim-yig‘im ishlarining borishi bilan tanishdi. Tuman rahbarlari va soha mas’ullari otryadlar tomonidan amalga oshirilayotgan ishlar to‘g‘risida hisobot berdi. O‘rim ishlarini samarali va tizimli tashkil etgan holda hosilni nes-nobud qilmasdan, muddatida yig‘ib olish topshirildi.
