Ko‘rsatkich yanada oshiriladi

Mamlakatimizda IT sohasi eksportini 1 milliard AQSH dollariga yetkazish maqsad qilingan. Bu borada asosiy harakat kuchini yoshlar tashkil etadi. Xususan, Surxondaryo viloyatida o‘tgan yilda IT xizmatlari eksporti 3 million AQSH dollariga yetgan bo‘la, joriy yil yakuniga qadar bu ko‘rsatkichni yanada oshirish, IT xizmatlari eksportchilari sonini 20 nafarga, “IT park” rezidentlari sonini esa 100 nafarga yetkazish rejalashtirilgan.
Viloyat hokimi Ulug‘bek Qosimov IT sohasini yanada rivojlantirish maqsadida yurtimizdagi yetakchi IT kompaniyalarini jalb etgan holda amalga oshiriladigan loyihalar taqdimoti bilan tanishdi. Jumladan, ta’lim, onlayn kurslar, logistika xizmatlari, sun’iy intellekt va dronlar orqali qishloq xo‘jaligida innovatsion boshqaruvni joriy etish bo‘yicha loyihalar “Joylinks”, “Astrocode”, “Grine Termez” va “Record MIR” kompaniyalari mutaxassislari tomonidan taqdim etildi.
Shuningdek, yoshlarni IT sohasiga o‘qitish, ayniqsa, kam ta’minlangan oilalar farzandlarini bepul ta’lim bilan qamrab olish va daromadli ish o‘rinlari yaratish masalalari muhokama qilinib, kelgusida amalga oshiriladigan vazifalar belgilab olindi.