Xalqimiz o‘tgan asrlar davomida nimalarni boshidan kechirmadi deysiz. Sinovli va murakkab davrlarning o‘z qahramonlari, xaloskorlari ham bor edi. XX asr boshida maydonga chiqqan Mahmudxo‘ja Behbudiy Turkiston jadidlik harakatining asoschisi hisoblanadi. U milliy ozodlik harakatining buyuk namoyandasi sifatida ilm-fan, ta’lim va tarbiya, adabiyot va san’at, matbuot sohalarini rivojlantirish, jahondagi ilg‘or taraqqiyot yutuqlarini o‘zlashtirish orqali xalqimizning ongu tafakkurini yuksaltirish hamda hurriyatga erishish yo‘lida o‘z hayotini baxsh etgan fidoyi zotdir.
Mahmudxo‘ja Behbudiy yurtimizda birinchilar qatorida ilk zamonaviy maktablar tashkil qilish, ular uchun zarur darsliklar yaratish, nashriyot va teatrlar barpo etish ishlariga bosh-qosh bo‘ldi. Mohir publitsist sifatida o‘z davrining dolzarb muammolariga bag‘ishlangan qator salmoqli asarlar va ikki yuzdan ortiq maqolalar yaratdi.
Yurtimizda Mahmudxo‘ja Behbudiy xotirasini abadiylashtirish, hayoti va faoliyatini chuqur tadqiq qilish, ilmiy va badiiy asarlarini keng ommalashtirishga alohida e’tibor qaratilmoqda. Behbudiy asarlarining yosh avlod intellektual va ma’naviy salohiyatini oshirish, shu asosda ularni Yangi O‘zbekiston bunyodkorlari, chinakam vatanparvar insonlar etib tarbiyalash borasidagi o‘rni va ahamiyatini inobatga olib hamda uning bebaho merosini yanada kengroq o‘rganish va targ‘ib etish maqsadida Mahmudxo‘ja Behbudiy tavalludining 150 yilligi yurtimizda keng nishonlanmoqda. Ayniqsa, “Jadid adabiyoti namoyondalari” ruknida tayyorlangan kitoblar to‘plamining kutubxonamiz fondidan o‘rin olgani jadidchi ajdodlarimizni yanada yaxshiroq tanish, o‘rganishga sharoit yaratdi.
Qimmat ALIYEVA,
Viloyat Bolalar kutubxonasi kitoblarni jamlash va katalog yaratish bo‘limi mutaxassisi
