“Milliy tiklanish” demokratik partiyasi Surxondaryo viloyati Kengashi tashabbusi bilan Termiz tumanida “Sumalak sayli” tashkil etildi. Katta doshqozonda milliy taomlarimizdan sumalak qaynatildi, osh damlandi. Onaxonlarimiz tomonidan kuy-qo‘shiqlar kuylandi, raqslar ijrosi dilga xush yoqib, aytilgan kelin salomlar tadbir ishtirokchilari ko‘nglini xushnud etdi.
— Sumalak saylini aynan xonadonda tashkil qilganimiz bejiz emas, – deydi, Xalq deputatlari Termiz shahar Kengashi deputati Mahbuba Ro‘ziyeva. – Chunki bolajonlar bu tansiq taom tayyorlanish jarayonini o‘z ko‘zlari bilan ko‘rsalar, albatta, ular qalbidagi ezgulik va birdamlik, qadriyat va anʼanalarimizga hurmat tuyg‘usi yanada jo‘sh uradi, milliy bayram – Navro‘zi olam va uning shoh taomi sumalak haqidagi qarashlari yanada kengayadi.
Doshqozonda tayyorlangan sumalak esa shu hududda yashovchi oilalarga, nuroniy otaxon-onaxonlarga ham tarqatildi.
