10 million AQSH dollarilik investitsiya kiritiladi

Prezidentimizning Malayziyaga davlat tashrifi doirasida ta’lim forumi, biznes vakillari ishtirokidagi uchrashuvlar, turistik ko‘rgazmalar o‘tkazganidan xabaringiz bor. Ushbu uchrashuv va tadbirlarda o‘zaro manfaatli aloqalar ko‘lamini kengaytirish bo‘yicha kelishuvlarga erishildi.
Yurtimiz delegatsiyasi tarkibida ushbu mamlakatda bo‘lib turgan Termiz davlat universiteti rektori Malayziyaning “Kedah Agro Holdings” kompaniyasi mutasaddilari bilan muzokaralar o‘tkazib, qator yo‘nalishlar bo‘yicha hamkorlik shartnomalarini imzoladi. Mazkur hamkorlikning birinchi bosqichida kompaniya tomonidan viloyatimizda qishloq xo‘jaligi va baliqchilik tarmoqlarini ilmiy yondashuvlar asosida rivojlantirish loyihasiga 10 million AQSH dollarilik investitsiya kiritishga kelishib olindi.
Shuningdek, “Kedah Agro Holdings” kompaniyasi rahbariyati va ekspertlaridan iborat delegatsiyaning joriy yil aprel oyida viloyatimizga tashrifini tashkil etish, vohamiz salohiyatidan kelib chiqqan holda boshqa yo‘nalishlarda ham hamkorlikni kengaytirish bo‘yicha manfaatli kelishuvlar ishlab chiqish rejalashtirilmoqda.