Jamoatchillik eshituvi o‘tkazildi

Surxondaryo viloyatida o‘zlashtirilmagan yerlar, dasht va kengliklar bisyor. Ular bosqichma-bosqich o‘zlashtirilib, ekin maydonlariga, bog‘-u bo‘stonga aylantirilmoqda. Zero, odamlar yerning har qarichidan unumli foydalanib, o‘zlari va o‘zgalarga ham foyda keltirishni yaxshi bilishadi. Qolaversa, qishloq xo‘jaligi sohasida yangi innovatsiya va texnologiyalardan foydalangan holda yuqori hosildorlikka erishish imkonidan foydalanishlari quvonarli hol, albatta.
Shu ma’noda, Termiz tumanidagi “ORGANIC-LIMON” MCHJ tomonidan tumanning “Bunyodkor (Nurafshon)” MFY hududidan qurilishi rejalashtirilgan yondirish qurilmalari 100 Megavatdan kam quvvatga ega “Issiqxona” binosi qurilish maydoni ko‘zdan kechirildi. “Bunyodkor” MFY idorasida mahalla faollari hamda “Davlat ekologik ekspertizasi markazi” DM Surxondaryo viloyat filiali xodimlari ishtirokida jamoatchilik nazorati (eshituvi) o‘tkazildi.