Do‘st

Bir kuni o‘g‘il uylanish maqsadida to‘y boshlabdi, to‘yga tayyorgarlik ko‘rar ekan ishlari ko‘payib ketibdi. Holdan toygan o‘g‘il otasiga iltimos qilibdi:
— Otajon, iltimos, mana do‘stlarimning telefon raqamlari, ularga qo‘ng‘iroq qilib, to‘yga taklif qiling, — debdi.
— Yaxshi o‘g‘lim, albatta, qo‘ng‘iroq qilaman, — javob beribdi ota.
To‘y kuni kuyovning bor-yo‘g‘i ikki do‘sti kelibdi. O‘g‘ilning jahli chiqib:
— Ota, sizga barcha o‘rtoqlarimga qo‘ng‘iroq qilishni so‘ragan edim-ku, — debdi. Shunda ota:
— O‘g‘lim, men sen aytganday qildim, lekin ularga sen katta bir muammoga o‘ralashib qolganingni, aynan bugun shu soatda shu joyga yordamga yetib kelishlarini so‘radim. Ko‘rib turibmizki, barcha DO‘STLARING shu yerda, qolganlari begonalar. Biz ham ularga begonamiz, — deya javob beribdi.