9 ta kanalda GES quriladi

Yilning qay faslida bo‘lmasin, elektr energiyasidan foydalanamiz, bu biz uchun zarurat va ehtiyojga aylangan. Afsuski, tabiiy resurslar bitmas-tuganmas emasligi har birimizni tejamkorlikka boshlashi bilan birga o‘z oldimizga yangi chora va yo‘llarni izlashga harakatga undaydi. Harakatlarimiz natijasi o‘laroq quyosh panellaridan foydlanish keng yo‘lga qo‘yilgan bo‘lsa, boshqa tomondan yangi GES qurishga, elektr energiyasi ishlab chiqarish quvvatlarini oshirishga xizmat qilmoqda. Surxondaryo viloyati hokimi Ulug‘bek Qosimov barcha sohalarga e’tibor qaratib, aholi turmushini yaxshilash, hayotini farovonlashtirish yo‘lida tinim bilmay, amalga oshirilayotgan ishlar bilan tanishish va ijrosini qattiq nazorat ostiga olgan. Ayni maqsadda hududlarga tashrifini Jarqo‘rg‘on va Qumqo‘rg‘on tumanlarida davom ettirdi.
Xususan, Jarqo‘rg‘on tumanidan oqib o‘tuvchi “Zang” kanalida kinetik turbinali mikro GES qurilishi bilan tanishdi. Uchta agregatdan iborat bo‘lgan mazkur inshoot 60 kVt elektr energiyasi ishlab chiqarish quvvatiga ega bo‘ladi. Shuningdek, mutasaddilar viloyat hududlaridagi 9 ta kanalda barpo etilishi rejalashtirilgan, umumiy 435 kVt quvvatga ega kinetik turbinali mikro GESlar loyihalari yuzasidan axborot berdi.
Shundan so‘ng, viloyat rahbari Qumqo‘rg‘on tumani “Bog‘aro” mahallasida joylashgan kichik sanoat zonasida lotlarda loyihalarni joylashtirish, tumanda ko‘p qavatli turar joylar qurish, shuningdek, sanoat zonasiga va tuman markaziga boruvchi yo‘llarni rekonstruksiya qilish loyihalari taqdimoti bilan tanishdi. Mutasaddilarga tegishli tavsiya va topshiriqlar berilib, loyihalarni shaharsozlik normalariga asosan amalga oshirish lozimligi ta’kidlandi.
Tashrif so‘nggida qurilish, to‘siqlarsiz muhit yaratish, kommunikatsiyalar, kommunal xo‘jalik, ekologiya va ko‘kalamzorlashtirish majmuasi tashkilotlari, shahar va tumanlar hokimlarining mas’ul o‘rinbosarlari ishtirokida viloyatda mazkur soha va tarmoqlarda amalga oshirilayotgan ishlar, yo‘l qo‘yilgan kamchiliklar muhokama qilinib, kelgusidagi vazifalar belgilab olindi.