Xalqimiz daromad ko‘rish sirlarini yaxshi biladi. Hech bo‘lmaganda, tomorqasida ekin-tikin qilib bo‘lsa-da, ro‘zg‘or tebratib, kamini to‘ldiradi. Yaxshi-da, qishloq xo‘jaligi mahsulotlari yetishtirish bilan butun oila a’zolari foydali mehnat bilan band bo‘ladi. Ayniqsa, vohamizning yilning to‘rt faslida ham oziq-ovqat ekinlari yetishtirib, undan salmoqli daromad olish imkoni bo‘lganda, nega endi bu imkondan foydalanmasligimiz kerak?
Sho‘rchi tumanining “Navro‘z” mahallasiga kelsangiz, tomorqada halol mehnat qilib, obod va farovon turmush kechirayotgan oilalarning osoyishta Vatan, mo‘tadil ob-havo va unumdor tuproqqa, rizq-nasibasi butligiga shukrona aytib, to‘kin yashayotganidan bahridilingiz ochiladi. Qishin-yozin bozorlarimiz rastalarini bezab turadigan turli tabiiy oziq-ovqat mahsulotlarining dasturxonlarimiz obodligini ta’minlayotganidan faxr hissini tuyasiz.
